ရှမ်းပြည်နယ်ရင်းနှီးမြှုပ်နှံမှုကော်မတီအကြောင်း
ရှမ်းပြည်နယ်ရင်းနှီးမြှုပ်နှံမှုကော်မတီအနေဖြင့် ရှမ်းပြည်နယ်အတွင်း ရင်းနှီးမြှုပ်နှံမှုလုပ်ငန်းများ ဖွံ့ဖြိုးတိုးတက်စေရန်နှင့် လွယ်ကူချောမွေ့စေရန် ကြိုးပမ်းဆောင်ရွက်လျှက်ရှိပြီး ရင်းနှီးမြှုပ်နှံ မှုလုပ်ငန်းများကို စိစစ်၍ အတည်ပြုမိန့်များ ထုတ်ပေးနိုင်ရန်ဆောင်ရွက်လျှက်ရှိပါသည်။ ရှမ်းပြည်နယ်ရင်းနှီးမြှုပ်နှံမှုကော်မတီမှ မြန်မာနိုင်ငံသားရင်းနှီးမြှုပ်နှံမှုလုပ်ငန်း (၁၃)ခု၊ စုစုပေါင်း ရင်းနှီးမြှုပ်နှံမှုပမာဏ ကျပ်သန်း(၃၁၆၂၀.၇၄၄)နှင့် နိုင်ငံခြားရင်းနှီးမြှုပ်နှံမှုလုပ်ငန်း (၅)ခု စုစုပေါင်း ရင်းနှီးမြှုပ်နှံမှုပမာဏ အမေရိကန်ဒေါ်လာ (၁၁)သန်း ကို အတည်ပြုမိန့်များ ထုတ်ပေးခဲ့ပြီး ဖြစ်ပါသည်။ အလုပ်အကိုင်အခွင့်အလမ်း မြန်မာနိုင်ငံသား(၉၉၄)ဦး နိုင်ငံခြားသား(၅၃)ဦး အတွက် ဖန်တီးပေးနိုင်ခဲ့ပြီး ဆက်လက်၍ ရင်းနှီးမြှုပ်နှံမှုလုပ်ငန်းများကို အတည်ပြုမိန့်များ ထုတ်ပေးနိုင်ရန် စိစစ်ဆောင်ရွက်လျှက်ရှိပါသည်။
ရှမ်းပြည်နယ်ရင်းနှီးမြှုပ်နှံမှုလုပ်ငန်းများကြီးကြပ်ရေးအဖွဲ့သည် ရှမ်းပြည်နယ်အတွင်းရှိ ရင်းနှီးမြှုပ်နှံမှု လုပ်ငန်းများကို ဥပဒေ၊ လုပ်ထုံးလုပ်နည်းများနှင့်အညီ အဆင်ပြေချောမွေ့စွာ ဆောင်ရွက် နိုင်ရန်အတွက် ကွင်းဆင်းဝန်ဆောင်မှုများ ဆောင်ရွက်ပေးလျှက်ရှိပါသည်။
ရှမ်းပြည်နယ်ရင်းနှီးမြှုပ်နှံမှုကော်မတီမှ ဒေသတွင်းဖွံ့ဖြိုးတိုးတက်မှုကို အစဉ်တစိုက် ဆောင်ရွက်နေသည့်အပြင် အမျိုးသားစီးပွားဖွံ့ဖြိုးတိုးတက်ရေးကိုလည်း ဆောင်ရွက်လျက်ရှိပါသည်။ ထို့ပြင် ရှမ်းပြည်နယ်ရင်းနှီးမြှုပ်နှံမှုမြှင့်တင်ရေးစီမံကိန်းရေးဆွဲ အကောင် အထည်ဖော် ဆောင်ရွက်နိုင်ရန်အတွက် ရှမ်းပြည်နယ် ရင်းနှီးမြှုပ်နှံမှုမြှင့်တင်ရေး လုပ်ငန်း ကော်မတီကို ဖွဲ့စည်းတာဝန်ပေးအပ်ခဲ့ပါသည်။ ရှမ်းပြည်နယ်ရင်းနှီးမြှုပ်နှံမှုမြှင့်တင်ရေး လုပ်ငန်းကော်မတီသည် ဂျာမဏီအပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ(GIZ)၏ အကူအညီဖြင့် ရှမ်းပြည်နယ်အတွင်းရှိ ရင်းနှီးမြှုပ်နှံမှုလုပ်ငန်းများ၏ စာရင်းအချက်အလက် များ ကောက်ယူပြီး အားနည်းချက်၊ အားသာချက်၊ အခွင့်အလမ်းနှင့် စိန်ခေါ်မှုများကို ဖော်ထုတ်၍ စီမံကိန်းများနှင့် မဟာဗျူဟာလုပ်ငန်းစဉ်များကို ရေးဆွဲအကောင်အထည်ဖော် ဆောင်ရွက်လျှက်ရှိပါသည်။
ရှမ်းပြည်နယ်ရင်းနှီးမြှုပ်နှံမှုကော်မတီအနေဖြင့် ရှမ်းပြည်နယ်အတွင်း ရင်းနှီးမြှုပ်နှံမှု လုပ်ငန်းများ ဖွံ့ဖြိုးတိုးတက်လာစေရန် ရည်ရွယ်၍ နှစ်စဉ် ဦးစားပေးကဏ္ဍများ ချမှတ် ဆောင်ရွက်လျှက်ရှိပါသည်။ ထို့ပြင် ဒေသတွင်း ရင်းနှီးမြှုပ်နှံမှုအခွင့်အလမ်းများကို ပြည်တွင်း/ပြည်ပ ရင်းနှီးမြှုပ်နှံသူများ သိရှိနိုင်ရန်အတွက် (၂၆.၁၂.၂၀၁၉) ရက်မှ (၂၇.၁၂.၂၀၁၉) ရက်အထိ ရှမ်းပြည်နယ် ရင်းနှီးမြှုပ်နှံမှုဖိုရမ် ကိုကျင်းပဆောင်ရွက်ခဲ့ပါသည်။ ရှမ်းပြည်နယ်ရင်းနှီးမြှုပ်နှံမှုကော်မတီ၏ လုပ်ငန်းဆောင်ရွက်ချက်များနှင့် ရှမ်းပြည်နယ်ရှိ ရင်းနှီးမြှုပ်နှံမှုလုပ်ငန်းဆိုင်ရာ သတင်းအချက်အလက်များကို အများပြည်သူနှင့် ပြည်တွင်း/ပြည်ပ ရင်းနှီးမြှုပ်နှံသူများ သိရှိနိုင်စေရန် ရှမ်းပြည်နယ်ရင်းနှီးမြှုပ်နှံမှုကော်မတီ Website ဖြစ်သော www.ssic.gov.mm တွင် ဖော်ပြပေးသွားမည်ဖြစ်ပါသည်။
